Mexina, polìtica, literadura e àteru… in lìngua sarda

Unu gou de su defendidori de su Borussia Dortmund abastat a sa truma de Löw po binci is òminis de Deschamps e intzertai sa de cuàturu bortas de sighida sa zona pòdiu a is Mundialis. Martis s’ 8 in Belo Horizonte su disafiu contras a sa Seleçao

ARRIU DE GENNÀRGIU – Po sa de cuàturu bias de sighida e sa de trexi bortas in sa stòria, sa Germània andat a sa mesu•finali de unu Mundiali. A su Maracanã de Arriu sa truma de Löw propassat de pagu sa Frantza gràtzias a unu gou de Hummels in su primu tempus. Partida de grandu truma, cumprida, sa de is tedescus chi ant lassau pagu ocasionis a Benzema e cumpàngius. Imoi sa Germània at a fai a trivas in mesu•finali cun su Brasili, chi at bintu 2 a 1 cun sa Colùmbia.

HUMMELS NO PERDONAT – Frantza-Germània no est unu disafiu fitianu me is garas chi contant, e no me is Mundialis sceti: custu est de fatu su de cuàturu atòbius iridau intra de is duas trumas, chi de s’àteru si funt agatadas in partidas amistantziosas sceti. In campu mollus a sprigu: 4-3-3. Deschamps torrat a cuberai a Sakho a sa defensa, intamis in mesu•campu giogant Pogba, Cabaye e Matuidi; a s’infrusada, cun Benzema, nci funt Valbuena e Griezmann. Löw, chena su scalificau Mustafi, torrat a ponni a Lahm in s’arrolu de tertzinu deretu, in mesu•campu si torrat a biri de s’inghitzu Khedira in s’interis chi ananti ddoi est Klose in s’arrolu de centruananti cun Müller e Özil a is atzas. Sa partida dda fait sa Germània cun sa Frantza serrada agoa e faendi apretu bàsciu. Ma sa primu ocasioni est po is transalpinus: bella atzioni a fundu de parti de manca de Valbuena chi ponit sa bòcia in s’ària e Benzema tirat aforas de pagu. Hummels a defensa sarvat contras a su sòlitu Benzema e agoa andat a marcai. Minutu 12: punimenta de Kroos de parti de manca, bòcia in s’ària e Hummels de conca antìcipat a Varane e nci•dda fichit asuta de sa traessa. Segundu gou mundiali po su centrali tedescu apustis de su cun su Portogallu.

SA FRANTZA SI•NDI SCIDAT A S’ACABU DE TEMPUS – Sa Frantza est ferta ma no arrespundit. Sa defensa de sa Germània poderat beni e candu is giogadoris de Deschamps provant a nci stichiri bòcias longas e fundudas, amancat sa pretzisioni. A su de 24′ Debuchy arriscat meda agafendi sa malliedda de Klose in s’ària: Pitana no biit. Passat pagu e Debuchy ddoi torrat: cuntatu in s’ària cun Müller, ma custa borta no parit una farta crara e lìmpia. Is transalpinus in orabona funt perigulosus in s’ùrtimu cuartu de ora de su primu tempus. Apustis de unu traessoni de parti de dereta de Griezmann, Valbuena tirat a porta ma agatat sa parada de Neuer; e Hummels sarvat tambeni contras a Benzema apustis de su torrabòcia de su portieri. A s’acabu nci provat duas bortas Benzema: a primu sarvat Hummels cun su corpus, a segundu parat Neuer.

FRANTZA GENEROSA MA PAGU PRETZISA – A s’inghitzu de sa torrada sa Frantza si•nci ghetat a sa metadi de campu tedesca circhendi luegus sa paridadi. Carcat a sa defensa de Löw, chi perou apoderat. Apoderat pruschetotu Hummels chi est in dònnia logu e andat a serrai a chinisisiat infrusadori. Is bòcias bonas nci iant a essi puru po is frantzesus ma Evra innantis e Griezmann agoa no amasedant su palloni aìnturu de ària. E candu a su de 16′ Varane intinnat beni de conca nci pensat sa seguresa de Neuer a fai abarrai sa partida in s’ 1 a 0.

SCHÜRRLE ACANTA A SU 2 A 0 – Löw càmbiat Klose cun Schürrle e s’intrau noeddu donat cussa lestresa in prus chi serbit a is tedescus po essi perigulosus in contrapei. Deschamps si scretit de Sakho, chi no est in sa mellus conditzioni: intrat Koscielny. E prus a tardu intrat Remy in logu de Cabaye po una Frantza prus infrusadora. Müller e Schürrle intantis s’agatant apari cosa de spantu ma is cungruiduras insoru no funt pretzisas. Candu intamis Schürrle intinnat beni sa bòcia, a su de 37′, apustis de unu contrapei de Özil, ddoi est Lloris a aguantai is frantzesus in giogu tambeni. Schürrle tenit un’àtera ocasioni a su de 42′ ma si•nci ghetat Varane ananti a su portieri. A s’àtera atza est Benzema su prus òmini perigulosu, ma Neuer est sèmpiri scidu e fait una parada detzididora a su de cuàturu minutus de aciunta, arregalendi a sa Germània sa mesu•finali.
F. S., RepSport

Frantza-Germània 0 a 1 (primu tempus 0 a 1)
Marcadori: 12′ pt Hummels.

Frantza (4-3-3): Lloris 6,5, Debuchy 5,5, Varane 5, Sakho 6 (26′ st Koscielny 6), Evra 6, Pogba 5,5, Cabaye 6 (27′ st Remy 5,5), Matuidi 5, Valbuena 6,5 (40′ st Giroud sv), Benzema 6, Griezmann 6,5. Insagiadori: Deschamps.
Germània (4-3-3): Neuer 7, Lahm 6,5, Boateng 6, Hummels 7,5, Höwedes 6,5, Khedira 6,5, Schweinsteiger 6, Kroos 6,5 (46′ st Kramer s. v.), Müller 6,5, Klose 5,5 (23′ st Schürrle 6), Özil 6 (38′ st Götze s. v.). Insagiadori: Löw.
Àrbitru: Pitana (Argentina). Castialìnias: Maidana e Belatti (Argentina). Su de 4 ofitzialis: Eriksson (Svètzia).
Àngulus: 5 a 3 po sa Frantza.
Aciuntas: 1′ e 4′.
Amonestaus: Khedira e Schweinsteiger po giogu fartosu.
Spetadoris: 74.240.

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: