Po nexi de totu su chi tèngiu de fai (cun su traballu de dotori, e cun s’atividadi fitiana in s’Acadèmia de su Sardu) funt casi duus annus chi no pòngiu nudda in custu diònicu (su fueddu chi mi seu imbentau po diàriu eletrònicu). Imoi apu pensau, cun s’annu nou chi est intrendi, ca mi-ndi bollu torrai a pigai su strobbu de nci ponni càncua cosa fatu-fatu, mancai siat una frasixedda scéti (e po oi nd’apu scioberau una chi funtzionat de esempru etotu).
In prus bollu imperai puru custu mèdiu po arregordai su chi seus fadendi in Acadèmia, ca in s’ùrtimu simana de tempus nd’eus stantargiau progetus de vàllia, chi minescint de essi pregonaus e connotus (e unu ddu presentaus sàbudu chi benit su 7 de gennàrgiu, si-ddu pòngiu in d-un’àtera postada mancai cras). Duncas po oi pòngiu un’amonestu chi fatzu po primu cosa a mei etotu, ma creu chi potzat balli po totus.
Norabonas mannas a totus po unu 2023 de paxi, sulenu e prenu de totu su chi disigiais.
Su chi ti ses acostumau a fai
Anònimu
in s’annu bèciu
t’at a donai is pròpius arresurtaus
in s’annu nou puru.
Muda càncua cosa
o no at a mudai nudda.de Agenda Lusofarmaco 2023
Stèvini ...su chercu 
Comments on: "Circaus de torrai a movi" (1)
Cuntentu meda chi apas decìdiu de torrai a scriri. Pensau mai as de publicai fintzas càncua pìndula de gramàtica? Si seus cuncentraus meda (tropu) apitzus de sa chistioni de standard e ortografia, ma medas de nosu no funt bonus a scriri deaberus in sardu e faeus amesturus de
gramàtica e maneras de nai italianas e sardas. Tui scriis beni meda, duncas is cunsillus tuus iant a agiudai.