Mexina, polìtica, literadura e àteru… in lìngua sarda

Posts tagged ‘mundiali’

Germània campioni de su mundu

Una balentia a is suprementàrius de Götze, s’infrusadori giovuneddu intrau in logu de Klose, donat a sa truma de Löw sa cupa apustis de 24 annus. S’Argentina surrùngiat tres ocasionis de oru sperditziadas de Higuaìn, Messi e Palacio. Palu de Höwedes in su primu tempus. Est sa primu borta de un’europea me is Amèricas

ARRIU DE GENNÀRGIU – Sa Germània est campioni de su mundu po sa de cuàturu bortas che a s’Itàlia. Apustis de sa finali in Corea e duas bortas a su de tres postus, in su 2006 e in su 2010, ponit sa corona a una simana stravanada andendi a si pigai cudda cupa persighia de 24 annus. Binta s’Argentina chi perou, comenti in su 1990, dd’at bàtia sceti una giogada. In Roma nc’iat pensau Brehme a su de 81’, cun d-un’arrigori pricurau cun d-una trassa de Völler, custa borta nc’est bòfia una maia de Götze, s’anadicheddu lègiu, su chi dd’iant scrocorigau su ct e sa crìtica apustis de is furriamentas de inghitzu, po detzidi sa gara apustis de 123’ de batalla meda echilibrada etotu. E po su fuba est una dii stòrica: est sa primu bintòria de una truma europea in Amèrica.

UNA TRUMA DE FENÒMENUS – At bintu sa prus truma forti, de custu no nci at duda peruna. Sa truma chi at fatu biri su mellus giogu e is mellus giogadoris. A nai sa beridadi sa finali no est stètia sa prus partida bella ma, una borta tambeni, at amostau personalidadi e caràtiri a fuliadura. Mancai sballada de fadiori, apustis de ai sunfriu po totu sa torrada, me is suprementàrius at torrau a pigai in manu su cumandu de su giogu, at serrau s’Argentina in sa trescuartus sua e pagus momentus innantis de is arrigoris at agatau sa giogada chi at fatu sa diferèntzia cun duus òminis, Schürrle e Götze, chi tzertu no fiant is prus protagonistas abetaus. Po amostai unu cumplessu stravanau in su stai impari. Chapeau, nant is frantzesus.

ARGENTINA, CANTUS SURRÙNGIUS – S’Argentina tenit cosa de surrungiai. At tentu is mellus ocasionis, tres bortas at postu un’òmini ananti a sa porta ma no at tentu sa fridesa chi nci boliat po ferri a forti. Dd’ant traìxia pruschetotu Higuaìn, Messi e agoa Palacio. A s’atòbiu cun sa stòria no si funt fatus agatai. Bai e circa chi sa preneta, in 4 annus, ddis at a torrai a donai un’àtera ocasioni. In s’interis est seguru ca ant a passai notis medas chena podi dormiri comenti a totu is tifosus argentinus chi si fiant bisaus de si fai campionis ananti de is fradilis brasilianus tirriaus.

LÖW PERDIT A KHEDIRA E A KRAMER – A Löw ddi est tocau amarolla, a s’ùrtimu grei, de depi fai de mancu de Khedira, firmau in su callentamentu de unu barrancu muscolari. Aici nci at ghetau in sa batalla a Kramer su giovuneddu (impreau finsas a insandus 18’ sceti). Una finali malassortada sa de su mesanu de su Borussia Mönchengladbach chi apustis de 17’ feti, Garay ddi at tzacau unu corpu de coddu a sbarradura chi dd’at stèrriu a ko custringendi su ct a si torrai a studiai su pranu de batalla: intrat Schürrle cun Kroos torrau agoa acanta a Schweinsteiger, e Özil transiu apalas de Klose. Sabella at arrespustu chena de arriscai a Di Maria e donendi fiantza a is pròpius ùndixi postus contras a s’Olanda.

HIGUAÌN FARTAT S’ABANTAXU – Sa Germània luegus s’est posta meri de su mesu•campu apretendi ananti ma, faendi aici, s’est aberta a is contrapeis lestrus de s’Argentina chi, a su de 21’, at faddiu a sonu de corru s’1 a 0: Higuaìn, sprùndiu a solu ananti a sa porta de unu passìgiu de conca mali•fatu de Kroos, at tentu pressi tropu e at tirau aforas de mala manera de su liminaxi de s’ària. S’infrusadori de su Napoli s’est pigau vengàntzia a su de 30’ furriendi in arretza unu traessoni de parti dereta de Lavezzi ma Rizzoli at annuddau po unu foragiogu giustu.

PALU DE HÖWEDES – Sa Germània at dèpiu abetai su de 37’ po strobai a primìtziu a Romero: nci at pensau s’intrau noeddu Schürrle chi at cungruiu a su primu palu un’assistu bellu de parti de manca de Müller sena perou surprendi a su porteri de sa Samp. A su de 40’ s’est allutu totinduna Messi chi si•nc’est andau in ària a manu dereta, at sartau cun d-unu tocu lèbiu a Neuer lassendi su tempus a Boateng de nci stesiai sa bòcia ananti de sa lìnia. No est stètiu s’ùrtimu lampu de su primu tempus: giai in mesu a is minutus de aciunta difatis sa Germània est andada acanta acanta a s’abantaxu cun Höwedes chi cun d-unu corpu de conca de tres mèturus, a un’àngulu de parti dereta de Kroos, at intinnau, cosa de no crei, su palu a parti de manca de Romero, abarrau siddau.

MESSI TRAIXIT S’ARGENTINA – Sabella apustis de su pàsiu nd’at leau a Lavezzi, mortu de fadiori, arremprasendi•ddu cun Agüero. S’Argentina in dònnia manera no at mudau mollu e schemas e at sighiu a fai sunfriri sa Germània cun fichidas ainnantis fitianas. Sa diferèntzia dd’iat a ai pòtzia fai Messi ma su pei mancosu at traìxiu a su fora•classi de su Barcelona chi a primu at serrau tropu ingruxendi unu sprundimentu de Biglia e agoa at mandau tropu ladu unu tiru a furriadura de su liminaxi.

SCHÜRRLE IMBENTAT, GÖTZE MARCAT PO SA STÒRIA – Sa Germània at sunfriu, at fadiau a si proponni ananti a fitianu ma at fraigau tambeni un’ocasioni bona po passai a su de 80’ cun Kroos chi at tirau pagu pagu aforas a pei deretu de su liminaxi un’assistu de Özil. Amarolla a is suprementàrius duncas, aundi po maia sa truma de Löw at torrau a agatai energias cuadas. A sa càtedra funt artziaus pruschetotu Schweinsteiger e Schürrle. Su primu at inghitzau a gigantigiai a metadi de campu, su segundu at agatau is lampus chi serbiant po furriai a fundu a susu sa defensa arbubraxa. E apustis de ai fatu tremi a Romero a su de 91’, s’est imbentau sa faina de sa stòria a su de 113’: si•nc’est fuiu lestru lestru de Zabaleta a manu manca e at postu una bòcia de oru po Götze, intrau in logu de Klose, chi, assentau su palloni cun is piturras, at bintu a su porteri cun d-unu mancosu ingruxau a bòlidu stravanau. E aici notesta sa festa at a essi in Berlino.

J. M., RepSport

GERMÀNIA-ARGENTINA 1 a 0, apustis de tempus suprementàrius (0-0, 0-0, 0-0)
Germània (4-2-3-1):
 Neuer 7, Lahm 6.5, Boateng 7, Hummels 6, Höwedes 6, Schweinsteiger 7, Kroos 5.5, Müller 6.5, Kramer 6 (30′ st Schürrle 7.5), Özil 7 (15′ sts Mertesacker s. v.), Klose 6 (43′ st Götze 7.5). Insagiadori: Löw.
Argentina (4-3-1-2): Romero 6, Zabaleta 6.5, Garay 6.5, Demichelis 6.5, Rojo 6, Biglia 6.5, Mascherano 6.5, Perez 5.5 (4′ st Gago 6), Messi 5, Higuaìn 6 (32′ st Palacio 5), Lavezzi 6.5 (1′ st Agüero 6). Insagiadori: Sabella.
Àrbitru: Rizzoli (Itàlia) 5.5.
Marcadori: in su segundu ts a su de 8′ Götze.
Àngulus: 5 a 3 po sa Germània.
Aciuntas: 2′ e 3′; 0′ e 2′.
Amonestaus: Schweinsteiger, Höwedes, Mascherano, Agüero po giogu fartosu.
Spetadoris: 74.738.

Olanda – Argentina 2-4 apustis de is arrigoris

Su porteri argentinu ecisat a Vlaar e Sneijder de su discheddu, donendi a Messi e cumpàngius s’arregalu de torrai a fai una finali mundiali 24 annus apustis de s’ùrtima. Gara lègia, pagu ocasionis, cun Robben chi nci fùliat su puntu-partida a su de 90′ e Palacio chi in su suprementàriu gràtziat a s’Olanda

SANTU PÀULU – De su Santu Pàulu a Santu Pàulu. A 24 annus de distàntzia, s’Argentina serrat unu cìrculu maginàriu e torrat a tastai su sabori durci durci de una finali mundiali. In Napoli fiant stètius Goycoechea e Maradona a fai prangi a Donadoni, Serena e una natzioni totu, custrinta a arrimai sena allirghia s’istadi de is notis màgicas; is làgrimas brasilianas funt intamis a colori de aràngiu, sentèntzia marigosa po chini si bisàt de si torrai a indurciai sa buca apustis de sa sderruta cun sa Spànnia 4 annus a oi. A Louis van Gaal no ddi arrennescit su miràculu, ca forsis at detzìdiu de s’atriviri tropu pagu e de andai a cuaddu de s’unda de is arrigoris, giai bintus me is cuartus de finali. Su sarbadori de sa noti de Santu Pàulu est duncas s’òmini prus pagu abetau. Ca Sergio Romero at fatu disisperai bortas medas a is tifosus suus – pregontai a Genova, spunda Samp – e gosai a is aversantis. Ma notesta no. Duus arrigoris paraus asuba de cuàturu, Olanda traìxia de su mellus in campu de is suus (Vlaar) e de unu spetzialista che a Wesley Sneijder. Filera perfeta, intamis, po is òminis de Sabella, chi imoi sperat de torrai a cuberai a Angel Di Maria po s’ùrtima mòvida de su campionau.

IS SCEBERUS TÀTICUS – In s’Olanda ddoi est de Jong a ghiai is cumpàngius, cun Kuyt oramai calau beni meda in sa parti de mesu-campista de foras in su 3-5-2 e Sneijder sacrificau in d-un’arrolu prus de cursera che de gèniu. Su chi fut de s’Inter giogat una partida meda meda arregulada, denneghendi a Biglia – chi Sabella at sceberau impasa de Gago – finsas sa prus tenta pitica de si•nci stichiri sena bòcia. S’arrebus de comenti arremprasai a Di Maria Sabella dd’arresorvit cun s’intrada de Enzo Perez de s’inghitzu, alladiau a manu dereta in d-unu 4-4-2 chi at a biri scàmbius meda de logu cun Lavezzi e pagu prus. S’Argentina timit tropu de lassai mèturus a Robben e po cussu tenit siddaus is tertzinus – ddoi est Rojo e no Basanta a manu manca – a formai unu muru de defensa tostau che pedra, anca s’aciungit meda Mascherano, centrali cuau e inghitzadori de is pagus manòvaras arbubraxas. Messi bolit sèmpiri sa bòcia a peis, s’Olanda si serrat in pràtiga cun duas lìnias po abacai s’intzimia de su tenni bòcia s’Argentina e su steddu de su Barcelona circat sa glòria a 50-60 mèturus de sa porta. Cosa unu pagu traballosa. Una punimenta a su cuartu de ora nd’iat a podi fai sartai su tuponi a sa partida ma Cillessen cumprendit s’idea de su nùmuru 10 aversanti, abetendi sa bòcia in su palu suu e firmendi•dda sena barrancu perunu.

ROBBEN, PITICA SA FADDINA – Sa tanda de no manìgiu de bòcia de is Oranje est perfeta: Robben e van Persie s’aberint e faint apretu cun Wijnaldum e Sneijder, is àterus abarrant a càstiu. Traballosu, e mancai finsas no possìbili, sfundai in custas conditzionis. A nai sa beridadi, s’Argentina no nci provat meda meda, ca dònnia tenta de acotzai is infrusadoris dda firmat sa cursera stravanada a anticipai de duus grandus de Vrij e Vlaar. Aici mancu unu striori finsas a su pàsiu, candu van Gaal lassat me is spolladòrgius a Martins Indi, ùnica noda scannida in s’arrocu defendidori olandesu. S’intrada de Janmaat portat una pariga di transiduras in sa scachera tàtica de sa truma a colori de aràngiu. Kuyt passat a manu manca, Blind andat a fai su de tres centralis, s’intrau noeddu s’aposentat a manu dereta e a su de 13′ est grandiosu ligendi unu traessoni de Lavezzi po sa conca de Higuaìn, anticipendi a s’ùrtimu grei su centruananti de su Napoli. Cun de Jong sballau – intrat Clasie – funt duus is càmbius “sperditziaus” in pagus minutus e si cumprendit ca no nci at a essi glòria po Krul, s’òmini-crai de su cuartu de finali. S’ùnica ocasioni argentina in dònnia manera dda sbuidat su castialìnias: sa sperrada de Higuaìn tocat s’atza de foras de s’arretza, ma “el Pipita” no fut foragiogu mancai sinnalau diaici. Sa partida s’acostat a s’acabu, unu tacu de Sneijder ddi donat una scutulada de suncunas a su de 90′. Robben sighit sa giogada de su cumpàngiu, podit tirai a pei mancosu, su chi prus stimat, ma tocat tropu sa bòcia, si•nci dormit e no nd’aprofetat. Mascherano cun d-una liscinada disisperada sarvat is speras de finali de is suus, ajò a is suprementàrius.

LAMPIXEDDUS DE PAGU CONTU – Huntelaar po unu van Persie “no perbènniu” e Maxi Rodriguez po Lavezzi funt is mòvidas de inghitzu suprementàriu ma is primus 15′ de s’apendìtziu si uniformant a s’arrestu de sa gara, cun d-unu mancosu de foras de Robben chi provat a callentai, sena grandu arrennèscida, is guantus de Romero. Sabella bolit binci me is 120′ prus de cantu no ddu bollat van Gaal, s’intrada de Agüero e Palacio a s’acabu de is tempus arregularis dd’amostat e tocat a s’interista etotu sa mellus bòcia-gou de su merii. Tocu asuta po ddu ponni faci apari cun Cillessen, s’infrusadori ligit mali sa bessida de s’olandesu e provat sa paràbula de conca, arregalendi sa bòcia a su porteri oranje. Amancant 5′ a s’acabu de is suprementàrius e Messi provat a si torrai a allui, apustis de una mesora bona de sonnu. Traessoni de parti dereta, cungruidura pagu lìmpia de Maxi Rodriguez, tambeni totu fàtzili po Cillessen. Ùrtimu minutu, podit essi torra sa noti de s’Olanda. Janmaat cassat a Kuyt a is 16 mèturus, tiru a pei deretu arremaciau, ajò a is arrigoris.

ROMERO DETZIDIDORI – Is càmbius funt spaciaus cun s’intrada de Huntelaar, duncas in mesu de is palus olandesus si presentat su porteri titulari e no Krul. Ma a fai sa diferèntzia est s’àteru. Aberit s’Olanda e intregat su discheddu a Vlaar, chi at fatu una partida monumentali. Su fuba est bestiali, su defendidori tirat in mesu e Romero no podit fai àteru che arremaciai. Messi portat ainnantis is suus apustis de unu merii giogau a mamacua, marcant Robben e Garay puru. Tocat a Sneijder, chi ingruxat beni a pei deretu. No abastat. “Chiquito” bolat a manu dereta e narat ca no a s’interista bèciu, donendi a is cumpàngius s’ocasioni giusta po allonghiai. Agüero no dda sperdit, Kuyt tenit bius is suus tambeni, su de cuàturu arrigoris arbubraxus ddu tirat Maxi Rodriguez. Ddu tirat malamenti, in mesu, Cillessen cumprendit totu. Sa potèntzia de su deretu perou fait sa diferèntzia. Manus indùllias, cuàturu centrus asuba de cuàturu, s’Olanda prangit in s’interis chi s’Argentina bisat. De su Santu Pàulu a Santu Pàulu, a sa finali comenti 24 annus a oi. Su “nemigu” at a essi su pròpiu, sa Germània. Chi in Itàlia iat artziau sa Cupa, in d-una noti arregordada po s’arràbiu de Maradona contras a s’innu surbiau e po s’arrigori pagu craru marcau de Brehme, apustis de dd’ai bia svanessi cuàtur’annus innantis, candu Diego s’iat pigau in coddu unu Paisu e iat bintu unu tìtulu èpicu. S’Argentina si bisat e pedit a su “Dies” suu, Lionel Messi, una noti che a Diego. Una noti chi, po imoi etanti, no dd’at bia tambeni.
M. G., RepSport

OLANDA-ARGENTINA 2-4 apustis arrigoris (0-0, 0-0, 0-0, 0-0)

Olanda (3-5-2): Cillessen 6; de Vrij 6.5, Vlaar 7, Martins Indi 5.5 (1′ st Janmaat 6.5); Kuyt 6, Wijnaldum 5.5, de Jong 6 (17′ st Clasie 5.5), Sneijder 6, Blind 6.5; Robben 5, van Persie 5 (6′ pts Huntelaar 5.5). Insagiadori: van Gaal
Argentina (4-4-2): Romero 7; Zabaleta 6.5, Demichelis 6.5, Garay 6.5, Rojo 6; Perez 6.5 (36′ st Palacio 5.5), Biglia 6, Mascherano 7.5, Lavezzi 6 (10′ pts Rodriguez 6); Higuain 5.5 (37′ st Agüero 6), Messi 5. Insagiadori: Sabella
Àrbitru: Çakir (Turchia)
Amonestaus: Martins Indi, Demichelis e Huntelaar po giogu fartosu
Aciuntas: 2′, 3′, 1′ e 1′
Arrigoris: Vlaar parau, Messi gou, Robben gou, Garay gou, Sneijder parau, Agüero gou, Kuyt gou, Rodriguez gou

Brasili – Germània 1-7

Mesu-finali de no crei in Belo Horizonte, giai detzìdia apustis de 30′ de su primu tempus po is gous de Muller, Klose (mellus marcadori de sèmpiri a is Mundialis) e Kroos (allobada). In sa torrada àterus duus gous de Schürrle innantis de su gou de Oscar a s’acabu. Sa truma de Löw abetat sa bincidora de Argentina-Olanda

BELO HORIZONTE – Sa Germània torrat a scriri sa stòria. Tzacat a su Brasili “pentacampeão” sa peus sderruta de sèmpiri e bolat a fortza a sa finali. Mai in cent’annus sa Seleção iat incasciau 7 gous. E no pigàt una sciusciada cun 6 gous de diferèntzia inderetura de su 1920 (cun s’Uruguay). Si a totu custu aciungeus ca no perdiat in domu sua una gara ofitziali de 39 annus, fait a cumprendi sa grandiosidadi de s’impresa de is òminis de Löw chi de seguru at fatu torrai a sunfriri a su pòpulu brasilianu s’amargura sìmbili a sa de sa dii de sa sderruta cun s’Uruguay in sa finali de is Mundialis de su 1950.

BRASILI, PAGAU SU PESU DE SA PRESSIONI – Una bintòria cosa de macus chi no faiat mancu a maginai, e chi fait a spricai in d-una manera sceti: su Brasili s’est sciasciau asuta de su pesu de sa pressioni. No nci dd’at fata a arrespundi a s’abetu de su Paisu totu. At aguantau cun sa conca po 20′, e agoa, incasciau su 2 a 0, no s’est crètiu bonu a arresisti a s’undada de una truma chi at amostau de essi prus forti de tènnica e mellus organisada de tàtica. Scolari incapat s’iat a essi pòtziu giogai mellus is cartas suas ponendi unu medianu in prus e unu trescuartista diferenti a parti de ananti impasa de Bernard. Ma sa beridadi est ca sa partida dd’at pèrdia finsas innantis de calai in campu, candu at scìpiu de no podi imperai duus òminis-crai che a Thiago Silva e Neymar.

KLOSE, UNU GOU STÒRICU – Sa Germània si gosat unu merii de contai a is beniderus e si carìnniat pruschetotu a Miro Klose, s’ùnicu abarrau de sa finali maradita de su 2002, chi po una spètzia de nèmesi stòrica, in d-una noti sceti s’est pigau una bella vengàntzia cun su Brasili. At marcau su gou detzididori de su 2 a 0 e diaici s’est spruinau de asuba po sèmpiri sa presèntzia de Ronaldo in su cùcuru de sa lista de is marcadoris de dònnia tempus a is Mundialis. Imoi est a 16 e si podit permiti de castiai a totus de susu a bàsciu.

SCOLARI NO CÀMBIAT MOLLU – Scolari no at bòfiu cambiai mollu mancai fessit mala a poderai s’ausèntzia de Thiago Silva, scalificau, e Neymar, ingortu. At cunfirmau su 4-2-3-1 cun Dante, sceberau impasa de Henrique, in mesu de sa defensa e su giovuneddu de Bernard, giai steddu de is tifosus de s’Atletico Mineiro, in sa trescuartus. Mòvidas chi no nd’ant fatu atzicai a Löw chi sena si scerbeddai tropu at cunfirmau in totu is ùndixi chi ant bintu sa Frantza cun Müller, Kroos e Özil apalas de Klose.

MÜLLER-KLOSE, SU BRASILI S’INGENUGAT – Su Brasili nci at provau a ndi furai s’intzimia a is aversantis ma sa Germània no s’est spantada e a su primu afundu (11′) est passada: a un’àngulu de parti dereta de Kroos, David Luiz si•nd’est scarèsciu de Müller chi a bòlidu at infrissiu a Julio Cesar. Sa Seleção at sunfriu su corpu, at stontonau e is tedescus si•ndi funt aprofetaus sena piedadi cuncordendi a su de 23′ un’atzioni dìnnia de unu lìburu de fuba: Kroos at sprùndiu in s’ària po Müller chi at smarcau a Klose. Su primu tiru dd’at arremaciau Julio Cesar chi perou no at pòtziu fai nudda a su torrabòcia a pei deretu a filu de palu de su centruananti de sa Lazio.

SPETÀCULU DE KROOS E KHEDIRA – Est s’ùrtima amatzocada po is birdi-oru. Ddis sperefundat sa terra asuta de peis e, in tempus de 4′, incàsciant àterus 3 gous a tipu partidedda de insàgiu de sa giòbia. In càtedra funt artziaus pruschetotu Kroos e Khedira chi, furendi bòcia duas bortas a mesu-campu e spassiendi•sì a trastigiai cun Özil puru, ant fatu a befa sa defensa brasiliana.

SCHÜRRLE AMISCHINAT TAMBENI DE PRUS SU BRASILI – Apustis de su pàsiu Scolari nd’at leau a Hulk e a Fernandinho e su Brasili, cun d-un’arrastu de artivesa, at circau de arrespundi. A ddi nai ca no perou nci at pensau Neuer chi at arremaciau cun seguràntzia is cungruiduras de Oscar e de is intraus noeddus Ramires e Paulinho. Su perìgulu passau nd’at torrau a scidai sa Germània chi, sena piedadi, at torrau a matziai giogu e, boghendi frutu de sa gana de s’intrau noeddu Schürrle, at fertu àteras duas bias su Brasili.

OSCAR, GOU DE SA BANDERA – Surbiau de su pùbricu e amischinau de is “olè” arregalaus a is aversantis, su Brasili at fatu sceti una scutulada a s’acabu, apustis de ai arriscau finsas de incasciai s’ 8 a 0 de Özil sprùndiu a solu ananti a su porteri a su de 90′. E est arrennèsciu a marcai cun Oscar, me is minutus de aciunta, cussu gou de sa bandera chi assumancu no fait sa sderruta sa peus de sa stòria, po su tanti de gous in prus. Ma est arrisu cun croxolu etotu.
J. M., RepSport

BRASILI-GERMÀNIA 1 a 7 (primu tempus 0 a 5)

Brasili (4-2-3-1): Julio Cesar 4; Maicon 4, David Luiz 4.5, Dante 4, Marcelo 4.5; Luiz Gustavo 4, Fernandinho 4 (1′ st Paulinho 5); Bernard 4, Oscar 4.5, Hulk 4.5 (1′ st Ramires 5); Fred 4 (24′ st Willian 4.5). Insagiadori: Scolari.
Germània (4-2-3-1): Neuer 7; Lahm 8, Boateng 7, Hummels 7 (3′ st Mertesacker 6.5), Höwedes 7; Khedira 9 (31′ st Draxler s. v.), Schweinsteiger 7; Müller 8.5, Kroos 9, Özil 7.5; Klose 7.5. (12′ st Schürrle 8). Insagiadori: Löw.

Àrbitru: Rodriguez (Mèssicu) 6.5.
Marcadoris: pt 11′ Müller, 23′ Klose, 24 e 26′ Kroos, 29′ Khedira; st 24′ e 34′ Schürrle, 45′ Oscar.
Àngulus: 5 a 2 po su Brasili.
Aciuntas: 1′ e 2′.
Amonestau: Dante po giogu fartosu.
Spetadoris: 64.000.

Frantza – Germània 0-1

Unu gou de su defendidori de su Borussia Dortmund abastat a sa truma de Löw po binci is òminis de Deschamps e intzertai sa de cuàturu bortas de sighida sa zona pòdiu a is Mundialis. Martis s’ 8 in Belo Horizonte su disafiu contras a sa Seleçao

ARRIU DE GENNÀRGIU – Po sa de cuàturu bias de sighida e sa de trexi bortas in sa stòria, sa Germània andat a sa mesu•finali de unu Mundiali. A su Maracanã de Arriu sa truma de Löw propassat de pagu sa Frantza gràtzias a unu gou de Hummels in su primu tempus. Partida de grandu truma, cumprida, sa de is tedescus chi ant lassau pagu ocasionis a Benzema e cumpàngius. Imoi sa Germània at a fai a trivas in mesu•finali cun su Brasili, chi at bintu 2 a 1 cun sa Colùmbia.

HUMMELS NO PERDONAT – Frantza-Germània no est unu disafiu fitianu me is garas chi contant, e no me is Mundialis sceti: custu est de fatu su de cuàturu atòbius iridau intra de is duas trumas, chi de s’àteru si funt agatadas in partidas amistantziosas sceti. In campu mollus a sprigu: 4-3-3. Deschamps torrat a cuberai a Sakho a sa defensa, intamis in mesu•campu giogant Pogba, Cabaye e Matuidi; a s’infrusada, cun Benzema, nci funt Valbuena e Griezmann. Löw, chena su scalificau Mustafi, torrat a ponni a Lahm in s’arrolu de tertzinu deretu, in mesu•campu si torrat a biri de s’inghitzu Khedira in s’interis chi ananti ddoi est Klose in s’arrolu de centruananti cun Müller e Özil a is atzas. Sa partida dda fait sa Germània cun sa Frantza serrada agoa e faendi apretu bàsciu. Ma sa primu ocasioni est po is transalpinus: bella atzioni a fundu de parti de manca de Valbuena chi ponit sa bòcia in s’ària e Benzema tirat aforas de pagu. Hummels a defensa sarvat contras a su sòlitu Benzema e agoa andat a marcai. Minutu 12: punimenta de Kroos de parti de manca, bòcia in s’ària e Hummels de conca antìcipat a Varane e nci•dda fichit asuta de sa traessa. Segundu gou mundiali po su centrali tedescu apustis de su cun su Portogallu.

SA FRANTZA SI•NDI SCIDAT A S’ACABU DE TEMPUS – Sa Frantza est ferta ma no arrespundit. Sa defensa de sa Germània poderat beni e candu is giogadoris de Deschamps provant a nci stichiri bòcias longas e fundudas, amancat sa pretzisioni. A su de 24′ Debuchy arriscat meda agafendi sa malliedda de Klose in s’ària: Pitana no biit. Passat pagu e Debuchy ddoi torrat: cuntatu in s’ària cun Müller, ma custa borta no parit una farta crara e lìmpia. Is transalpinus in orabona funt perigulosus in s’ùrtimu cuartu de ora de su primu tempus. Apustis de unu traessoni de parti de dereta de Griezmann, Valbuena tirat a porta ma agatat sa parada de Neuer; e Hummels sarvat tambeni contras a Benzema apustis de su torrabòcia de su portieri. A s’acabu nci provat duas bortas Benzema: a primu sarvat Hummels cun su corpus, a segundu parat Neuer.

FRANTZA GENEROSA MA PAGU PRETZISA – A s’inghitzu de sa torrada sa Frantza si•nci ghetat a sa metadi de campu tedesca circhendi luegus sa paridadi. Carcat a sa defensa de Löw, chi perou apoderat. Apoderat pruschetotu Hummels chi est in dònnia logu e andat a serrai a chinisisiat infrusadori. Is bòcias bonas nci iant a essi puru po is frantzesus ma Evra innantis e Griezmann agoa no amasedant su palloni aìnturu de ària. E candu a su de 16′ Varane intinnat beni de conca nci pensat sa seguresa de Neuer a fai abarrai sa partida in s’ 1 a 0.

SCHÜRRLE ACANTA A SU 2 A 0 – Löw càmbiat Klose cun Schürrle e s’intrau noeddu donat cussa lestresa in prus chi serbit a is tedescus po essi perigulosus in contrapei. Deschamps si scretit de Sakho, chi no est in sa mellus conditzioni: intrat Koscielny. E prus a tardu intrat Remy in logu de Cabaye po una Frantza prus infrusadora. Müller e Schürrle intantis s’agatant apari cosa de spantu ma is cungruiduras insoru no funt pretzisas. Candu intamis Schürrle intinnat beni sa bòcia, a su de 37′, apustis de unu contrapei de Özil, ddoi est Lloris a aguantai is frantzesus in giogu tambeni. Schürrle tenit un’àtera ocasioni a su de 42′ ma si•nci ghetat Varane ananti a su portieri. A s’àtera atza est Benzema su prus òmini perigulosu, ma Neuer est sèmpiri scidu e fait una parada detzididora a su de cuàturu minutus de aciunta, arregalendi a sa Germània sa mesu•finali.
F. S., RepSport

Frantza-Germània 0 a 1 (primu tempus 0 a 1)
Marcadori: 12′ pt Hummels.

Frantza (4-3-3): Lloris 6,5, Debuchy 5,5, Varane 5, Sakho 6 (26′ st Koscielny 6), Evra 6, Pogba 5,5, Cabaye 6 (27′ st Remy 5,5), Matuidi 5, Valbuena 6,5 (40′ st Giroud sv), Benzema 6, Griezmann 6,5. Insagiadori: Deschamps.
Germània (4-3-3): Neuer 7, Lahm 6,5, Boateng 6, Hummels 7,5, Höwedes 6,5, Khedira 6,5, Schweinsteiger 6, Kroos 6,5 (46′ st Kramer s. v.), Müller 6,5, Klose 5,5 (23′ st Schürrle 6), Özil 6 (38′ st Götze s. v.). Insagiadori: Löw.
Àrbitru: Pitana (Argentina). Castialìnias: Maidana e Belatti (Argentina). Su de 4 ofitzialis: Eriksson (Svètzia).
Àngulus: 5 a 3 po sa Frantza.
Aciuntas: 1′ e 4′.
Amonestaus: Khedira e Schweinsteiger po giogu fartosu.
Spetadoris: 74.240.

Bèlgiu – Stadus Unius 2-1

Sa truma de Wilmots depit abetai is suprementàrius (nexi puru de is paradas de Howard) ma agoa bincit a is Stadus Unius: unu-duus in su primu tempus, a nudda serbit su gou de Green. Sàbudu in Brasìlia su disafiu a Messi

SALVADOR – Est unu Mundiali diesel. Unu Mundiali macu, cun disafius chi s’alluint a giogu giai sculau. Unu Mundiali grandiosu. A is cuartus si presentant totu is bincidoras de furriamenta, apustis de cincu suprementàrius in otu disafius, sena contai s’acabu a dillìriu intra Mèssicu e Olanda. Bessint cun onori is Stadus Unius, coru e artivesa a fuliadura ma tropu prus pagu calidadi de su Bèlgiu, chi apustis de un’arrenta tzopi-tzopi in sa furriamenta de inghitzu imprassat in orabona su gèniu stravanau de Romelu Lukaku, capassu in mesora de spruinai atesu aversantis e scretiduras asuba de issu. Su centruananti intrat in campu apustis de su de 90′ e segat in duus una partida chi is Aremigus Arrùbius ant merèsciu de binci, mancai arrischendi prus de una borta una sciusciada spantosa. Poita ca sa formatzioni de Jurgen Klinsmann s’arrendit sceti a is tres sùrbius, apoderada stantàrgia de Howard e tragada de sa sabiesa de Bradley e de sa camba de Yedlin, tertzinu deretu chi in logu de Johnson ponit in avolotu de manera stravanada sa defensa belgesa, chi cun 4 centralis sunfrit is giogadas a fichidura. Imoi po is òminis de Wilmots, sàbudu in Brasìlia, ddoi at a essi su disafiu cun s’Argentina.

AMELETZU VERTONGHEN – Sa faci noa de is Aremigus Arrùbius est sa de Origi, ghetau in campu de s’inghitzu apustis de is tres arrogus giogaus in sa furriamenta: mollus a sprigu po Wilmots e Klinsmann, 4-2-3-1 cun su tènnicu de is Stadus Unius chi sceberat a Bradley po s’arrolu de trescuartista tàticu apalas de Dempsey. Luegus un’atzìchidu po Howard, provau apustis de 40 segundus de un’ingruxau de Origi. Stadus Unius perou boluntadosus e sena timoria peruna. Bradley po Dempsey, tiru centrali de “Deuce”. Su Bèlgiu s’alluit e si•ndi studat. Break de Vertonghen, est issu a ghiai su contrapei innantis de aberri po De Bruyne, chi stringit de parti de manca tirendi mali a pei deretu. Est sa cursera giusta po impelli, Vertonghen arricit bòcia in fundu e dda ponit in mesu po Fellaini, ma serrat unu Beasley stravanau. Klinsmann perdit a Johnson po unu barrancu muscolari, finsas a ingunis su tertzinu no iat cumbintu, intrat Yedlin. Su primu tempus, in dònnia manera spassiosu, ddu serrat un’antìcipu beneditu de van Buyten a unu traessoni de s’intrau noeddu etotu. Est sceti s’antipastu de una gara destinada a arregalai spetàculu siat a sa torrada siat me is suprementàrius.

HOWARD SPETÀCULU – Primitziendi sa torrada su Bèlgiu apretat a is americanus. Howard àrtziat asuba de sa traessa unu corpu de conca de Mertens, Vertonghen ponit in mesu unu traessoni de si lingi is didus chi Origi e De Bruyne no atumbant, agoa su centruananti ferit s’atza de susu de sa traessa cun d-una bella furriada a bòlidu. S’infrusada sighit, Vertonghen circat sa porta a bòlidu a pei mancosu de ladus de foras ma no est assortau. Stadus Unius a fitianu arrogaus, Origi fait a bocidura candu arrennescit a movi sa defensa de Klinsmann; scatu fundudu e traessoni de parti de manca, Mertens de tacu, foras de unu nudda. Est passau unu cuartu de ora sceti. Wilmots tzèrriat aforas s’ala de su Nàpoli etotu, intrat Mirallas. Witsel nci provat de foras sena pretzisioni, a Origi ddi lompit a su pei deretu sa bòcia de su gou a su de 27′, apustis de un’atzioni insìstia de s’intrau noeddu; cungruidura centrali, Howard si ponit ananti casi sena si•nd’acatai. Is partis cuncàmbiant cuàturu minutus apustis. S’assistu de Origi est spantosu, Mirallas si presentat faci apari cun su cumpàngiu suu de truma in s’Everton; bincit su pei mancosu de su porteri americanu, e sa partida abarrat 0 a 0 tambeni candu tocat a Hazard a provai a pei deretu. Howard amostat is guantonis a is tirus de Origi e Kompany, Wondolowski nci fùliat de duus passus su puntu-partida a una spunda a bòlidu de Jones. Tocat a is suprementàrius. Tocat a Lukaku.

S‘URAGANU LUKAKU – Origi, apustis de ai sballau is aversantis suus, lassat logu a su collega. Su de tres minutus de su primu suprementàriu, grandu traballu de fìsicu a s’infrusada de Besler e a totu fua a parti dereta; traessoni po De Bruyne, Gonzalez dd’antìcipat a cambas sperradas ma no arrennescit a agatai s’echilìbriu, permitendi a su pantasista de arregolli sa bòcia e de nci fichiri s’ingruxada bincidora. Is Stadus Unius stontonant po su corpu pigau e no tenint sa fortza po cumbati paris sa fortza fìsica de Lukaku, chi in duus momentus impìnniat a Howard aicetotu che a Mirallas; sèmpiri presenti su castiadori americanu, ma ddi tocat a s’arrendi a s’acabu de su primu suprementàriu. De Bruyne portat sa transidura a parti de manca e imbucat po Lukaku, tiru mancosu poderosu a s’àngulu, est su gou de s’allobada. Klinsmann si giogat sa carta Green e arregollit sa posta luegus etotu. Bradley àrtziat sa conca e biit sa segada de su piciocheddu de su Bayern Monaco, Alderweireld dd’apoderat in giogu e no arrennescit a ddu firmai. Su tiru a pei deretu a bòlidu est tramposu e mandat in bùidu s’interbentu de Courtois, su Bèlgiu perdit sa seguresa e is Stadus Unius lompint acanta a su 2 a 2 cun d-unu tiru de contrabrìnchidu de ladus de foras de Jones. S’ùnica spera de is Aremigus Arrùbius est Lukaku, unu contras a tres, duas càrrigas e ingruxada mancosa, Howard no si fait frigai e arregalat a is cumpàngius s’ocasioni po su paris. Schema a bòcia firma, Bradley cassat a Wondolowski chi de prima insulat sa fichida de Dempsey. Courtois est s’ùnicu a cumprendi innantis sa giogada, bessida bàscia grandiosa, su Bèlgiu si•dd’at a biri cun s’Argentina. Est unu Mundiali stravanau diaderus.
M.G., RepSport

BÈLGIU-STADUS UNIUS 2 a 1 ats (pt 0 a 0, st 0 a 0, pts 2 a 0)
Marcadoris: 3′ pts De Bruyne, 15′ pts Lukaku, 2′ sts Green
Bèlgiu (4-2-3-1): Courtois 6.5; Alderweireld 5.5, van Buyten 6.5, Kompany 6, Vertonghen 7; Fellaini 6, Witsel 6; Mertens 6 (15′ st Mirallas 6), De Bruyne 7, Hazard 6 (6′ sts Chadli sv); Origi 6.5 (1′ pts Lukaku 7.5). Insagiadori: Wilmots
Stadus Unius (4-2-3-1): Howard 7, Johnson 5.5 (32′ pt Yedlin 7), Gonzalez 6, Besler 5.5, Beasley 6.5; Cameron 5.5, Jones 6; Zusi 6 (27′ st Wondolowski 5.5), Bradley 7, Bedoya 5.5 (1′ sts Green 6.5); Dempsey 6. Insagiadori: Klinsmann
Àrbitru: Haimoudi (Algeria)
Amonestaus: Cameron e Kompany po giogu fartosu
Aciuntas: 3′, 3′, 2′, 1′

Argentina-Bòsnia 2-1

Is arbubraxus intzìmiant bincendi 2 a 1 contras a sa Bòsnia. Aberit un’autogou de Kolasinac a su de 3′ de unu primu tempus de arrosci. A sa torrada sa prella de su Pùlixi, a s’acabu Ibisevic provat a dda torrai a aberri ma est tropu tardu

Issu si bisat de afestai asuba de cussu pardu birdi etotu su 13 de mesi•de•argiolas, dii de sa finali mundiali. In s’interis Leo Messi s’acuntentat: arregalat una maia de is suas a totu su mundu e cunchistat su Maracanã intzimiendi sa cupa in sa catedrali de su fuba. S’Argentina partit beni in custu Mundiali, 2 a 1 a sa Bòsnia cun pagu sfortzu, est a nai dormendi po totu unu tempus. Susic si depit mossiai is manus: s’autogou a su de 3′ de Kolasinac at furriau luegus a fundu assusu totu is pranus suus, a metadi de sa torrada dd’at acabada su Pùlixi. Tropu a trigadiu si•nd’est scidada cun su gou de Ibisevic. Sa primu presentada de su Paisu suu a su Mundiali si•ddu maginàt diferenti meda.

SU PÙLIXI DISAFIAT SU MUNDU — Est s’Argentina contras a sa Bòsnia ma est Messi contras a totus puru. Contras a su Brasili chi dd’aprètziat ma chi ddu timit che a su prus nemigu perigulosu. Contras a Carlitos Tevez: Leo depit amostai ca sa truma arbubraxa podit sighiri a fai de mancu de s’Apache. Contras a sa stòria sua etotu: po imoi unu gou mundiali sceti (e debadas puru) me is duas aparèssidas passadas (8 partidas). E finsas contras a issu etotu: stasoni arrica de gous (comenti a sèmpiri) ma no scallentosa, cundia de crìticas (sèmpiri cacendi in campu, s’evasioni fiscali…) e chena de bintòrias de importu: tocat a ddoi ponni arremèdiu.

FADDINAS E CÀSCHIDUS — E s’arremèdiu lompit luegus: 3′, Leo pinzellat una punimenta de parti de manca, Rojo carìnniat sa bòcia chi atumbat a is peis de Kolasinac. Arresurtau? Begovic frigau e Argentina ananti. Totu fàtzili? No, ca Messi scumparessit de su campu, e cun issu totu s’arbubraxa fait pagu, e cussu pagu ddu fait bastanti mali etotu. Sa Bòsnia arrespundit, s’intregat pruschetotu a su pei de Misimovic, su prus òmini chi arrapresentat sa Bòsnia Erzegòvina finsas ca tenit prus presèntzias (81 cun 25 gous), ma Hajrovic si•nci stichit in ària debadas po mori de sa bessida de Romero. In campu nci funt cincu “italianus”: su dorianu (imprestau a su Monaco), Fernandez (Napoli) e Campagnaro (Inter) a una parti, Lulic (Lazio) e Pjanic (Roma) a s’àtera. De su grogarrùbiu no lompint lampus, de su latziali giai: corpu de conca a su de 41′ furriau in àngulu de Romero. Acinnus timi-timi de Messi a su de 45′ cun cuàturu òminis sartaus arrovinendi totu perou cun d-un’assistu faddiu. Acabat su primu tempus, totu fait a nai sarvu chi siat stètiu unu grandu spetàculu.

ORABONA LEO! — Sabella cumprendit chi diaici no andat beni – mancai siat 1 a 0 – e insandus mudat totu: aforas Campagnaro e Maxi Rodriguez, aìnturu Gago e pruschetotu Higuain e bai cun su 4-3-3. Est una mòvida chi detzidit totu. S’arbubraxa est prus biatza, Messi ispirat a Aguero a su de 10′ ma El Kun si•nci papat s’allobada artziendi a tribuna su tiru a pei pratu deretu. Torra Aguero a su de 16′ tirat intamis de atraessai: sceberu malu, sa partida abarrat pèndili-pèndili. A dda serrai nci pensat Leo chi dormit, dormit, dormit… totinduna si•ndi scidat, scàmbiat a su de 20′ cun Higuain, si•nci andat cun su mancosu màgicu suu, s’acentrat e sèmpiri a pei mancosu nci•dda fichit a s’anguleddu: Begovic no podit nudda (2u centru a unu Mundiali, fiat abetendi•ddu de su 16 de làmpadas de su 2006, 8 annus a oi giustu giustu). S’Argentina imoi bincit e cumbincit. Susic provat sa segundu punta cun Ibisevic po Mujdza. Aìnturu Visca puru (àtera punta) po Hajrovic, agoa Medunjanin po Misimovic: si giogant totu is europeus chi perou parint fadiaus e a su contras s’Argentina inghitzat in orabona a giogai scapiada faendi spassiai is 75.000 de su Maracanã. A 5′ de s’acabu perou sa scoitada de Ibisevic (cun sa cumplicidadi de sa defensa argentina, unu pagheddu dormia) a su passìgiu fundudu de Lulic torrat a aberri sa partida: est sceti unu striori, s’Argentina sunfrit (aforas Aguero, aìnturu Biglia) ma ingollit a domu is tres puntus. Is cumentzus mundialis no funt mai fàtzilis (po ddu sciri, tocat a pregontai a s’Uruguay) ma po binci a Rio su 13 de mesi•de•argiolas nci at a bolli calincuna cosa in prus.

A.C., Gasport

Argentina- Bòsnia 2 a 1 (primu tempus 1 a 0)

Argentina (5-3-2): Romero; Zabaleta, Campagnaro (46’ Gago), F. Fernandez, Garay, Rojo (giallo); Mascherano, M. Rodriguez (46’ Higuain), Di Maria; Messi, Aguero (87’ Biglia). Insagiadori: Sabella.

Bòsnia (4-2-3-1): Begovic; Mujdza (69’ Ibisevic), Bicakcic, Spahic (giallo), Kolasinac; Pjanic, Besic; Hajrovic (71’ Visca), Misimovic (74’ Medunjanin), Lulic; Dzeko. Insagiadori: Susic.

Àrbitru: Aguilar (El Salvador)

Nodas: Amonestaus: Rojo (A) e Spahic (B) po giogu scurrègiu. Aciuntas: 2’, 4’.

Inghiliterra-Itàlia 1-2

Acabat 2-1 a Manaus: in su primu tempus Sturridge arrespundit a Marchisio, agoa detzidit SuperMario a su de 50′ po un’assistu de unu Candreva de vàllia

Prus fortis de sa mala sorti, de su spèddiu de sa primu borta, de sa mala fiantza, de totu: Manaus depiat essi un’inferru po s’Itàlia, intamis sa Natzionali de Prandelli intzìmiat su Mundiali cun d-unu 2 a 1 a s’Inghiliterra chi balit sa scalera po nci artziai a celu. Est chitzi tambeni po s’allosingai, seus sceti a s’inghitzu, ma a s’essi ingortu su capitanu Buffon iat lassau unus bellus cantu bruncus frungius in sa cambarada asula: scancellaus de una grandu performàntzia, apustis de una partida echilibrada e prena de ocasionis, chi a s’acabu prèmiat s’atrivimentu de chini circat sèmpiri de fraigai su giogu. Me is partidas amistantziosas sa Natzionali no luxit, ma in cussas ofitzialis no faddit giai mai. Una tzimia nci at a essi puru.

DDOI EST STERLING — S’Itàlia in s’Arena Amazonia est sa giai annuntziada, cun Chiellini a manu manca e Paletta in su centru de sa defensa. In s’Inghiliterra a s’acabu ddoi est Sterling e no Lallana, ma su piciocheddu-fenòmenu de su Liverpool s’aposentat apalas de Sturridge, cun Welbeck a manu dereta e Rooney a s’àter’atza. Sa mòvida de Hodgson iat a depi fai atzicai a Darmian, chi intamis de àteru no si tremit mancu po nudda. E fait che cuaddu curridori, boghendi profetu ca “Wazza” est pagu avesu a poderai sa fàscia. Sa mellus de totu is curreras de su laterali colori de arenada agatat a Balotelli chi arrennescit, orabona, a si•ndi smarcai de sa guàrdia de Jagielka e Cahill, ma s’atùmbidu de conca no ddi bessit. Est su primu tzèrriu asulu apustis de cincu perìgulus ingresus: duus mìssilis de Sturridge e Henderson, unu traessoni terra-terra ferenosu meda de Sterling e duus interbentus disisperaus de Barzagli, chi amantat is fartas de unu Paletta acapiau e ababalucau, arriscu de fai autogou puru.

DONADA E TORRADA — Nau aici, iat a parri chi s’Itàlia siat dominada. Ma no est aici, est totu un’àtera cosa. Is perìgulus benint de contrapeis aversàrius, chi nascint amarolla candu si circat de fraigai una manòvara. Is duus faidoris traballant beni, Pirlo e Verratti si circant, a sa parti de Candreva e Darmian arrennesceus a alladiai su giogu. Amancat unu pagheddu de agiudu a Balotelli in s’ària, ma teneus àteras possibilidadis. Insandus candu Verratti currit a arregolli un’àngulu curtzu e Pirlo fait velu in su passìgiu suu, Marchisio s’agatat mèturus de libertadi po scarrigai su pei deretu de binti mèturus. Gou! Unu tiru terra-terra chi Hart no ddoi lompit. Ma no nc’est mancu su tempus de afestai: passant duus minutus e unu palloni pèrdiu malamenti acabat a Sterling, chi ponit in partida Rooney; asuba a su traessoni suu Sturridge si•nci ghetat che unu centumetrista po s’1 a 1. Unu pàsiu ca afestendi su gou s’est ingortu su fisioterapista Lewin, e un’acabu de tempus cun is asulus fortzendi: una paràbula de Balotelli sarvada in sa lìnia de Jagielka cun Hart sartau, agoa unu palu de Candreva con d-un’àteru terra-terra. Totus a si pasiai in mesu de is tzacarramanus.

SUPERMARIO GOU — Bessida de is spolladòrgius cun d-una parada de Sìrigu a Sturridge, ma a su de 5’ est torra arretronu po s’Itàlia: Candreva fait amachiai a Baines, Cahill si perdit a Balotelli e Mario ddi sartat apalas, incorrendi su 2 a 1 chi fait sciopai Manaus, aundi medas ddu stimant. Is minutus apustis funt arbigaus, Sturridge che unu dimòniu ponit a traballai a Sirigu e Rooney si•nci papat su paris agoa de unu foragiogu asulu faddiu. Aìnturu Thiago Motta po Verratti, Hodgson arrespundit cun Barkley impasa de Welbeck. In mesu nci funt duas chèscias in àrea de Welbeck e Gerrard, ma Kuipers fait sighiri chena nci pensai unu grei. Is Lionis nci provant finsas cun is tertzinus: a primu Johnson, agoa Baines cun d-una punimenta. Ndi besseus chena dannu. Su clima de Manaus puru nosi donat una manu de agiudu, ca smènguat s’afoghìgiu de is aversantis nostus tèndius in sa punna de sodighi. Is duus c.t. si marcant apari: aìnturu Immobile impari a Wilshere, aìnturu Parolo cun Lallana. Foras Balotelli, Henderson, Candreva e Sturridge. Gerrard de punimenta nosi fait sa gràtzia, is minutus currint, Rooney sperdit s’ùrtimu arregalu de Barkley. S’ùrtimu striori dd’arregalat Pirlo, osannau de su pòpulu de s’Amazonia comenti a su Maracanà: traessa tzacada de punimenta me is minutus de aciunta. Agoa est acabau. Impràssidus, arrisus. “We go again”, nos’iat a benni a conca de nai, furendi•ndi is fueddus famaus de insulamentu a Gerrard… ma giai chi no boleus fai sa fini de su Liverpool suu in sa Premier League, lasseus a perdi. Nosi bieus a Recife: su 20 de làmpadas batalla po sa primatzia cun sa Costa Rica. Dd’estis a ai crètiu mai?

S.C., Gasport

INGHILITERRA-ITÀLIA 1 a 2 (primu tempus 1 a 1)

MARCADORIS: pt Marchisio (It) 35’, Sturridge (In) 37’; st Balotelli (It) 5’.

INGHILITERRA (4-2-3-1): Hart; Johnson, Cahill, Jagielka, Baines; Henderson (28’ s.t. Wilshere), Gerrard; Welbeck (16’ s.t. Barkley), Sterling, Rooney; Sturridge (34’ s.t. Lallana). Insagiadori: Hodgson.

ITÀLIA (4-1-3-1-1): Sirigu; Darmian, Barzagli, Paletta, Chiellini; De Rossi; Verratti (12’ s.t. Motta), Pirlo, Marchisio; Candreva (34’ s.t. Parolo); Balotelli (28’ s.t. Immobile). Insagiadori: Prandelli.

ÀRBITRU: Kuipers (Olanda)

NODAS: amonestau Sterling po giogu scurrègiu. Aciuntas: 2’; 5’.