Prus in artu de sa tìrria

Scideus totus beni meda ca chini si pigat strobbu e si movit po fai càncua cosa po su chi pensat siat profetosu po su beni pùbricu, est a fitianu atacau de is fengiosus chi pratigant su sport, abitau meda, de no fai nudda e fueddai mali de is àterus. Custa est una de is malesas de s’òmini chi a dolumannu mi parit chi in Sardìnnia siat prus presenti che in àterus logus.

Comentechisiat apu agatau duas fràsias chi nosi donant inditus po arrennesci a barigai custus barrancus e a bivi mellus, a sa saludi de is fengiosus. A s’insinniamentu de su fundadori de su buddhismu est aciunta sa pensada de unu scridori modernu de aforismas chi si narat ca est de is fortis a sciri “castiai e passai”, comenti naràt su grandu poeta.

Chi sigheus a pensai a dònnia borta
chi is àterus s’ant traìxïu, delùdiu,
imbovau o fatu arrennegai,
su coru nostu at a abarrai
sèmpiri prenu de tìrria.
Imparaus a lassai a perdi e a essi prexaus.

Gautama Buddha, mòngiu e filòsofu

A bortas tocat a lassai a perdi
e, credei-mì,
nci bolit prus coràgiu.

Andrea Lenti

de Agenda Lusofarmaco 2023

Becesa

Oi chi seu aprontendi-mì po andai a afestai a babbu chi, biadu a issu, at fatu 95 annus e tenit bisura tambeni de no s’essi fadiau de bivi, apu agatau custu dìciu de su grandu scientziau e grand’òmini chi no s’at donau ainas matemàticas o fìsicas scéti, ma unas cantu prellas de sabiesa puru.

Aici totus!

Unu est bèciu
scéti candu
is surrùngius chi tenit
funt prus de is bisus
chi dd’abarrant.

Albert Einstein, scientziau

de Agenda Lusofarmaco 2023

Fai sèmpiri su chi tocat

Custu dìciu de oi m’est pràxïu ca tenit su sètiu de unu calembour, e ponit sa duda chi siat prus de importu su crei o su fai (creu in su chi fatzu o fatzu su chi nci creu?). Deu dd’apu unu pagu murigau e dd’apu postu a manera simètrica ca mi pariat chi in sardu sonessit mellus aici. No lompit luegus luegus, tocat a nci pensai cuncentrendi-sì pagu pagu.

E a s’acabbu nosi donat un’amonestu po si cumbinci a fai su chi si parit bonu e giustu: ca crei in su chi si fait bessit prus discansosu puru e arriscat de giustificai cosas de pagu importu.

A bortas est meda prus traballosu a ponni in pràtiga su chi minescit diaderus de essi fatu.

Est bellu meda
a nci crei
in su chi fais.
Ma mellus tambeni
su chi nci creis
est a ddu fai.

Anònimu

de Agenda Lusofarmaco 2023

Circaus de torrai a movi

Po nexi de totu su chi tèngiu de fai (cun su traballu de dotori, e cun s’atividadi fitiana in s’Acadèmia de su Sardu) funt casi duus annus chi no pòngiu nudda in custu diònicu (su fueddu chi mi seu imbentau po diàriu eletrònicu). Imoi apu pensau, cun s’annu nou chi est intrendi, ca mi-ndi bollu torrai a pigai su strobbu de nci ponni càncua cosa fatu-fatu, mancai siat una frasixedda scéti (e po oi nd’apu scioberau una chi funtzionat de esempru etotu).

In prus bollu imperai puru custu mèdiu po arregordai su chi seus fadendi in Acadèmia, ca in s’ùrtimu simana de tempus nd’eus stantargiau progetus de vàllia, chi minescint de essi pregonaus e connotus (e unu ddu presentaus sàbudu chi benit su 7 de gennàrgiu, si-ddu pòngiu in d-un’àtera postada mancai cras). Duncas po oi pòngiu un’amonestu chi fatzu po primu cosa a mei etotu, ma creu chi potzat balli po totus.

Norabonas mannas a totus po unu 2023 de paxi, sulenu e prenu de totu su chi disigiais.

Su chi ti ses acostumau a fai
in s’annu bèciu
t’at a donai is pròpius arresurtaus
in s’annu nou puru.
Muda càncua cosa
o no at a mudai nudda.

Anònimu

de Agenda Lusofarmaco 2023